ROXAS CITY -Ginsuspende ang klase sa Bayuyan Elementary School sa banwa sang President Roxas, Capiz matapos nga nagluntad ang engkwentro sa tunga sang ginapatihan tropa sang gobyerno kag New People’s Army (NPA).
Sa interview sang Bombo Radyo Roxas kay Mayor Receliste ‘’Tanoy’’ Escolin, gilayon sini ginpadulungan ang lugar matapos makabaton sang impormasyon gikan kay punong barangay Rudolfo Botbot Estrella angut sa nabatian nga asud asod nga lupok sa nabukid nga bahin sang amo nga barangay.
Gilayon ginmanduan sang alkalde ang mga principal sang Bayuyan Elementary School nga si Silvia Jawara nga i-secure ang mga estudyante nga yara sa buluthuan kag indi sila pagpahanugutan nga makaguwa.
Apang matapos mabatian sang mga ginikanan ang mabaskog nga lupok sang matag-as nga kalibre sang armas, gilayon sila nga nagpadulong sa eskwelahan kag pilit nga ginkuha kag gindala pauli ang mga kabataan.
Ginkumpirma sang kapulisan nga may sightings na sila sang mga NPA sa lugar, apang indi lamang matiyempuhan bangud nagahalain halin sang lokasyon ang rebelde nga grupo.
Samtang tuman nga nabalaka sa karon ang pamilya sang chief tanod nga si Renante Fuentes, bangud yara ini sa area sang ginluntaran sang encounter matapos nga nagpahalab sang mga kasapatan kag ginatsekyar ang mga tanum nga luy-a.
