ROXAS CITY – Suspendido karon ang mga klase sa elementarya kag sekondarya sa mga eskwelahan sa Roxas City, bangud sa mga pag-ulan nga dala sang malain nga panahon nga nagtuga sang mga pagbaha.
Sa exclusive interview sang Bombo Radyo Roxas kay Mayor Ronnie Dadivas, ginpahayag sini nga tinutuyo sang nasambit nga direktiba nga masiguro ang kaluwasan sang mga estudyante.
Ginpanugyanan man sang opisyal ang mga estudyante nga magpabilin sa ila mga balay para malikawan nga ma-stranded sa dalan.
Nakahanda man ang City Disaster Risk Reduction and Management Office nga magresponde sa magakinahanglan sang bulig.
Ginmandu man sang alkalde sa mga barangay officials nga mangin alerto kag gilayon hatagan sang bulig ang ila mga constituents nga mabutang sa alang alang bangud sa mga pag-ulan nga magatuga sang mga pagbaha.
Samtang suspendido man ang klase sa tanan nga lebel sa banwa sang Pilar, President Roxas, Maayon kag Ivisan.
Sa bahin naman sang Panay, suspendido ang elementarya, sekondarya kag senior high school kag sa Pontevedra suspendido ang klase sa pre-school tobtob senior high school.
