ROXAS CITY – Opisyal nga nagbukas ang klase sa mga eskwelahan sa Thailand subong nga adlaw, Hulyo 1, 2020.
Ini ang ginkompirmar ni Bombo International Correspondent Paul Porras, tumandok sang Dumarao, Capiz kag naga-trabaho bilang isa ka manunudlo sa Nonthaburi province, sa nasambit nga pungsod.
Ginpahayag sini nga hugot ang nangin monitoring sang Ministry of Health sa kaso sang coronavirus disease (COVID-19) sa pungsod antes ginpahanugutan ang liwat nga pagbukas sang klase.
Agud malikawan ang liwat nga paglapta sang nasambit nga balatian, ginlimitahan sa 20 ka mga estudyante ang kada hulot-klasehan kag hugot man nga ginapatuman ang mga health protocols kapareho sang pagpahamtang sang sanitation area sa kada eskwelahan, pag-obserba sang physical distancing kag pagsuksok sang facemask.
Ginpahayag sini nga duha ka beses sa sulod sang isa ka semana ang klase sang kada estudyante.
Hugot man nga ginadumilian ang mga programa ukon aktibidad nga may yara sang pagtililipon sang mga estudyante.
May mga ginikanan naman suno diri nga ginpili sa gihapon nga mag-online class ang ila mga kabataan bangud sa kahadlok nga malatnan sang nasambit nga balatian.
Ginkompirmar man ni Porras nga bangud sa pagnubo sang numero sang enrollees, may mga eskwelahan nga nag-iban sang mga manunudlo kun sa diin may pipila ka mga Pinoy nga naapektuhan.
