ROXAS CITY – Yara na sa state of decomposition sang nasapwan ang isa ka kolektor sang lending company sa isa ka maligwin nga lugar sa Sitio Cassandra, Barangay Punta Tabuc, Roxas City.
Nakilala ang biktima nga si Renante Cepra alyas Nonoy 36-anyos sang Barangay Maya, Balasan, Iloilo sang iya mga kaupdanan sa trabaho kag sa nakita nga ID kag driver’s license sa iya nga wallet.
Suno sa kaupod sa trabaho ni Cepra, katapusan nga nakita ang biktima sang Martes nga adlaw sa ila nga talatapan.
Ginaalegar nga nagpauli pa ini sa iya boarding house, apang nagbalik kag nag-upod sa isa nila ka kaupod nga kolektor.
Apang ginreport nga wala na ini nakapauli rason nga ginpa-blotter sa istasyon sang pulisya ang iya nga pagkadula.
Samtang natigayon nga masapwan ang bangkay ni Cepra matapos nga nakasimhot sang indi maayo nga baho ang mga residente nga naga-estar sa amo nga lugar.
Suno sa isa ka ginang nga ila ginkatingala ang pagtaghol sang ido duha na ka adlaw sumugod subong.
Bangud diri, ila gintsekyar ang ginhalinan sang baho, tobtob nakita ang bangkay sang isa ka lalaki nga may higot ang liog.
Matandaan nga nagpanawagan man ang pamilya sang biktima sa Bombo Radyo Roxas, matapos nga pila na ini ka adlaw nga wala nakapauli sa iya nga boarding house.
