ROXAS CITY – Patay na sang nasapwan ang konduktor sang ceres bus liner sa ginatrabahuan nga bus sa Kilometer 2, Barangay Lawaan, Roxas City.
Ginkilala ang biktima kay Reymund Elizares sang Barangay Tinaytayan, Dumarao, Capiz.
Suno sa driver sang bus nga kaupod sang biktima, nakita pa sini nga nag-inum kagab-i si Elizares kag naga-estorya sa cellphone sa nobya nga yara sa Metro Manila sang magsaka para magtulog.
Ginkatingala lamang sang driver nga nakatapos na ini paligo kag ginapukaw si Elizares, apang wala ini nagasabat ukon nagahulag.
Sa pagkabalaka nga may malain nga natabo sa biktima, nagpangayo ini sang bulig sa iban nga yara sa terminal para tsekyaron ang kahimtangan sang biktima nga sa ila pagtan-aw wala na nagaginhawa.
Ginapatihan nga ginbangungot si Elizares samtang nagakatulog.
