ROXAS CITY – Dismayado si City Councilor Midelo Ocampo matapos nga wala masumiter sa konseho sang syudad ang gina-request nga datus angut sa numero sang mga barangay sa syudad sang Roxas nga nakabaton na sang bugas sang Roxas City government.
Bangud diri suno sa konsehal nagrequest ini sa SP secretary nga magsulat sa City Social Welfare and Development Office (CSWDO) bangud ang natungdan nga ahensiya sang gobyerno ang may ihibalo sa numero sang sako sang bugas nga napanagtag kag ang nagbaton nga mga resipyente sa idalum sang food security program sang Roxas City government.
Ginpahayag pa ni Ocampo nga katuyuan sang pagpangayo sang nasambit nga dokumento agud matul-id ang aktwal nga numero sang mga barangay nga nakabaton sang nasambit nga ayuda agud mangin klaro ini sa tanan.
Samtang aminado ang opisyal nga wala sini mauyunan ang kaundan sang sabat sang alkalde sang syudad sa sulat ni Konsehal Moreno ‘’ Moring’’ Gonzaga nga kun may yara pa sang palamangkutanon angut sa nasambit nga isyu, mahimo nga magdirekta sila sa talatapan sang alkalde.
Suno kay Ocampo nga kasubong indi ini tama bangud yara ang CSWDO nga makahatag man sang sabat sa ila palamangkutanon.
