ROXAS CITY – Wala nagauntat ang konseho sang Barangay Lanot, Roxas City sa ila nga kampanya kontra sa balatian nga dengue.
Ini ang ginpahayag ni Punong Barangay Rolando Tuazon sang mainterview sang Bombo Radyo.
Suno kay Tuazon nga subong nga maulanon na ang paniempo, mas ginpasangkad pa nila ang ila mga lihok agud matapna ang pagduging sang lamok.
Ginsapol sini ang ila mga Barangay Health Workers nga amo ang gintulinan nga magpaintiendi sa pumuluyo sa mga pamaagi agud makalikaw sa amo nga balatian.
Ginatinguhaan man sini nga matumod ang mga lugar nga masami ginateniran sang mga lamok kag ang pamilya sang mga nakaangkon sang balatian nga dengue.
Nagaapelar man ini sang kooperasyon sang mga pumuluyo agud mangin madinalag-on ang amo nga kampanya kag maamligan ang ikaayong-lawas sang tanan batuk sa nasambit nga balatian.
