Gin-athag sang isa ka professor sa journalism ang kontrobersiya nga pag-aresto sang founder sang Peanut Gallery Media Network (PGMN) may kaangtanan sa ginaalegar extortion ang indi dapat i-angot sa isyu sang press freedom.
Suno kay Prof. Danilo Arao sang UP Diliman, importante nga tan-awon kun ang ginahimo sang isa ka media organization nagasunod sa ethical standards sang journalism.
Ginpahayag man sini nga ang ginaalegar “kill fee” ukon pagkuha sang bayad agud indi pag-release ang report isa ka klaro nga paglapas sa journalistic ethics.
Apang, gindugang niya nga kinahanglan pa gihapon ma-establisar ang kamatuoran, ilabi na nga ginpanginwala sang Peanut Gallery Media Network ang mga alegasyon kag nagasiling nga sila ang biktima sang setup.
Dugang pa sini, kun nga mapamatud-an nga extortion ang kaso, makabig ini nga indi pag-atake sa media kundi isa ka krimen.
Ginkwestyon man niya ang daku nga kantidad sang kwarta nga ginaalegar involved sa insidente.
Suno sa iya, ang lehitimo nga media nagasunod sa mataas nga standard sang journalism kag may accountability.
Sa pihak nga bahin, nagpanindugan ang Peanut Gallery Media Network nga sila ang gin-setup kag nagpasalig nga magabalos sa mga nagpasaka sang reklamo.
