Indi lipod sa ihibalo sang duha ka mga punong barangay sang Barangay Pawa, Panay kag Lonoy, Sapian, Capiz ang pagpatigayon sang iligal nga pagbulang sa ila lugar, apang ila ini ginbadlong kag ginpahanumdum nga hugot ini nga ginabawal.
Sa pagpakig-angut sang Bombo News team kay Kapitan Edilberto Bandejas sang Barangay Pawa, Panay, ginsiling sini nga wala sila nagkulang sa pagsaway kag pagpahangup sa nadakpan nga mga indibidwal nga nagabulang nga gilayon man nagsunod kag nag-untat.
Apang posible ginlita lita lamang sila kag nagpangita sang malayo nga lugar sa diin liwat sila nagpatigayon sang iligal nga bulang.
Suno kay Kapitan Bandejas nga indi tanan nga oras mabantayan ang mga nagabulang sang iya mga barangay kagawad kag mga tanod, bangud kasubong nga sila ang ginabantayan sa diin kun makita nga naglakat na sila, nagapangita sang lugar nga sarang mapatigayunan sang bulang ang pasaway nga mga bulangero.
Naghinyo na lamang ini sang kooperasyon sa mga pumuluyo nga pananglitan may makita sila nga nagapatigayon sang iligal nga pagbulang, mahimo lamang impormahon ang mga mga opisyales sang barangay agud ila ini madakpan.
Samtang kasubong man sini ang nangin pahayag ni Kapitan Pancho Orario sang Barangay Lonoy, Sapian nga may yara gid sang salawayon nga mga indibidwal nga matapos madakpan nga nagapatigayon sang iligal nga pagbulang, magapromesa nga magauntat na apang lita litaon lamang ang mga opisyales sang barangay kag kapulisan kag mabalik sa iligal nga aktibidad.
Nag-apelar lamang si Orario sa mga pumuluyo nga buligan sila sa ila monitoring kag pananglitan may yara sang makit-an, gilayon pahibaluon sila sa konseho ukon mga pulis agud madakpan kag mapasakaan sang panumbungon.
