Aksidente nga bumunggo ang kotse sa kasugata nga Wing Van Truck sa Barangay Cudian, Ivisan, Capiz.
Ginkilala ang drayber sang Wing Van Truck kay alyas “Edgar”, 33-anyos kag residente sang barangay Salvacion, Baao, Camarines Norte, samtang ginkilala naman ang drayber sang kotse sa kay alyas “Jocky”, 36-anyos kag residente sang Barangay Balijuagan, Roxas City.
Sa pagpakig-angut sang Bombo Radyo kay PMAJ. Ruby Magallanes, hepe sang Ivisan MPS, ginpahayag nga samtang ginasubay ni alyas “Jocky” ang dalanon sa may bahin sang Barangay Cudian, Ivisan padulong kun tani sa Barangay Poblacion Sur sang amu nga banwa sakay sang iya nga salakyan.
Pahayag pa sang hepe nga lumapaw sa iya nga linya ang amo nga kotse rason nga bumunggo ini sa kasugata nga truck nga ginamaneho naman ni alyas “Edgar”.
Dugang pa sini, nga bangud sa impact, nag-angkon sang pilas sa wala nga tuhod kag liog si alyas “Jocky” nga ginpadapatan naman sang nagakaigo nga pagbulong samtang yara naman sa istable nga kahimtangan ang drayber sang Wing Van Truck.
Samtang, ginpahayag nga natulugan ang driver sang amo nga kotse rason nga natabo ang insidente.
Sa karon, nagapabilin sa kustodiya sang Ivisan MPS si alyas “Jocky” kalakip ang iya sini nga salakyan para sa nakaigo nga disposisyon.
