Kulang ang dokumento ukon indi kumpleto ang ginsumiter nga requirements sang admin office sang Bailan District Hospital rason nga na-atrasar ang sweldo sang 40 ka mga empleyado.
Ini ang pagpaathag ni Loren Camelo Aberonia, administrative officer IV sang provincial accountant office sa reklamo sang mga empleyado sang Bailan district hospital nga wala maswelduhan sang masobra isa ka bulan.
Suno kay Aberonia nga kulang sang pila ka mga dokumento kasubong sang Daily Time Record ukon DTR kag sala ang computation gani ila ini ginapabalik sa natungdan nga talatapan.
Kun gilayon nga mabalik sa ila ang corrected documents, ginasuguran na ang pagproseso sa sweldo sang mga empleyado.
Matandaan nga nagdangup sa Bombo Radyo ang isa ka concerned employee para i-reklamo ang wala pagbaton sang sweldo humalin Abril 1 tobtob sa karon.
