ROXAS CITY – Nasunog ang kusina nga bahin sang isa ka puluy-an sa Arches Subdivision, Barangay Baybay, Roxas City, Capiz.
Ang amu nga puluy-an ang ginapanag-iyahan ni Fely Arpas, kag ginapahayag nga isa ini ka ancestral house.
Sa impormasyon nga nakuha sang Bombo Radyo sa lugar, ginapahayag nga takna alas 7:00 sang gab-i nagluntad ang amu nga sunog.
Mahibaluan nga wala sa amu nga porsyon ang umilistar diri sang natabo ang amu nga sunog kag ulihi nalang ini nga natalupangdan.
Gindeklarar naman nga fireout sang mga katapo sang Bombero takna alas 8:03 sang gab-i.
Ang amu nga sunog ang nagbilin sang kahalitan nga nagabalor P600,000.
Wala naman sang may nabalhag nga nagkalapilasan sang natabo ang amu nga insidente.
Sa karon, nagapadayon ang imbestigasyon sang mga katapo sang bombero agud nga matumod ang gintunaan sang sunog.
