ROXAS CITY – Ginklaro sang alkalde sang banwa sang Dumarao, Capiz nga wala nakaguwa sa ila nga quarantine facility ang locally-stranded individual (LSI) nga pinakauna nga coronavirus disease (COVID-19) case nga napagkit sa amo nga banwa.
Ini ang gin-athag ni Mayor Edgardo Arancillo sang mainterview sang Bombo Radyo.
Suno kay Arancillo, ang nasambit nga LSI ang naga-edad sang 29 anyos nga lalaki nga naghalin sa Muntinlupa City, Metro Manila apang nagpamalibad na ang alkalde nga ipalayag ang barangay sang amo nga pasyente sa banwa.
Ginpahayag sini nga humalin sang nag-abot ang amo nga lalaki sa banwa, gilayon ini nga gin-diretso sa Temporary Treatment Monitoring Facility (TTMF).
Sadtong Hulyo 21 ini nag-abot nga gilayon ginpaidalom sa real-time polymerase chain reaction (RT-PCR) test.
Makaligad ang tatlo ka adlaw, nagguwa ang resulta sadtong Hulyo 24 nga positibo ini sa amo nga balatian.
Ginpahayag pa sang alkalde nga ‘asymptomatic’ ang amo nga pasyente ukon wala nakitaan sang anuman nga sintomas.
Yara na karon ang nasambit nga lalaki sa quarantine facility sang ila nga barangay.
Sa karon suno kay Arancillo, nagdangat na sa kapin 220 ang nakapauli nga LSI’s sa Dumarao kun sa diin 42 pa diri ang naka-facility quarantine.
Nagdangat naman sa 76 ang nakapauli nga Returning Overseas Filipinos (ROF’s) sa banwa kun sa diin 18 sa mga ini ang nagapabilin nga naka-facility quarantine.
