Wala sang nakita nga bastante nga basehan ang Senate Blue Ribbon Committee agud pasabton si President Ferdinand Marcos Jr. may kaangtanan sa ginapahayag mga iregularidad sa mga flood control project sang gobyerno, suno kay Senador Panfilo Lacson.
Ginsiling ni Lacson nga base sa draft report sang komite, indi direkta nga involved ang Presidente sa isyu bangud nga limitado ang iya nga papel sa pag-apruba sang General Appropriations Act (GAA).
Dugang pa sang senador, mas nagakadapat nga itanyag sa House Committee on Justice ang isyu sang accountability sang Presidente, ilabi na kag nauna na nga ginbasura sang nasambit nga komite ang reklamo nga impeachment batuk kay Marcos.
Subong man, gin-athag ni Lacson nga padayon pa sa gihapon nga talakayon sang Senate Blue Ribbon Committee ang mga masunod nga tikang natuhoy sa kontrobersiya sa flood control projects, kalakip ang posible nga salabton sang iban pa nga mga involved.
Madumduman nga sang Miyerkules, ginbasura sang House Committee on Justice ang duha ka mga reklamo nga impeachment batuk kay President Marcos bangud sa kakulangan sang bastante nga substansiya.
Nahibaluan nga ang una nga reklamo ang ginpasaka sang abogado nga si Andre de Jesus, nga nag-akusar sa Presidente sang betrayal of public trust kag culpable violation of the Constitution. Samtang, ang ika-duha nga reklamo ang naghalin sa Makabayan bloc, nga nagaangot kay Marcos sa ginaalegar pagpapatuman sang Baselined-Balanced-Managed (BBM) parametric formula sa alokasyon sang mga proyekto pang-imprastraktura, nga ginasiling nagresulta sa mga “ghost,” substandard, kag overpriced nga flood control projects.
