Nadakpan sang Roxas City Police Station ang isa ka lalaki matapos ginserbehan sang warrant of arrest may kaangtanan sa paglapas sang isa ka city ordinance sa Roxas City.
Ang subject person amo si alyas Peter, 37 anyos, isa ka driver, kag residente sang Barangay IX, Roxas City.
Ang nasambit nga warrant may kaangtanan sa paglapas sang City/Municipal Ordinance No. 042-2002, Chapter VI, Section 1 (P) ukon ang indi pagsunod sa traffic sign, nga may kaangtanan nga Criminal Case No. C-25-18652-03.
Ang bench warrant of arrest ginpagwa kag ginpirmahan ni Hon. Kathleen G. Delantar, Presiding Judge sang Municipal Trial Court in Cities, Sixth Judicial Region, Branch 02, Roxas City, nga may petsa Mayo 9, 2025.
Ginrekomendar naman sang korte ang ₱3,000.00 nga piyansa para sa temporaryo nga kahilwayan sang akusado.
Sa karon, yara sa kustodiya sang Roxas City Custodial Facility si alyas Peter para sa nagakaigo nga disposisyon antes siya igatugyan sa korte nga nagpagwa sang warrant.
