TAPAZ, CAPIZ – Arestado ang isa ka lalaki sa buy-bust operation nga ginpatigayon sa Barangay Daan Banwa, Tapaz, Capiz.
Ginpangunahan sang Capiz Provincial Police Drug Enforcement Unit (PPDEU) ang operasyon kaupod ang Philippine Drug Enforcement Agency (PDEA) Regional Office 6.
Ang nadakpan amo si alias Jay-Jay, kag residente sang Barangay Agcococ, Tapaz, Capiz, apang temporaryo nga nagatinir sa Barangay Candelaria sa nasambit nga banwa.
Nkuha sa posisyon sang arestado ang mga masunod: P1,500 nga buy-bust money, 4 ka heat-sealed transparent plastic sachet sang suspected shabu, 1 pc aluminum foil, 1 pc black coin purse kag 1 unit sang Yamaha Sniper 155 motorsiklo nga nagaduag itom kag wala sang plate number.
Ang nakumpiskar nga illegal nga droga ginabanta may kabug-aton nga 15 grams, nga may standard drug price nga mas ukon menos P102,000.
Magapangatubang ang arestado sang kaso nga paglapas sa Republic Act No. 9165 ukon ang Comprehensive Dangerous Drugs Act of 2002.
Nagapabilin ini sa kustodiya sang mga otoridad para sa nagakaigo nga disposisyon.
– With a reports from Bombo Jessa Mae De Los Santos
