Arestado ang isa ka lalaki sa ginpatigayon nga drug buy-bust operation sa Brgy. San Jose, Roxas City.
Ang arestado amo si alyas Norberto, 34-anyos kag residente sang nasambit nga lugar.
Sa interview sang Bombo Radyo kay Police Lieutenant Colonel Rogelio Tomagtang Jr., Officer-in-Charge sang Roxas Component City Police Station, iya ginpahayag nga nakuha sa paghinakop sang subject person ang tatlo ka sachet sang suspected shabu nga may kabug-aton sang tatlo ka gramos nga may standard drug price nga P20,400.
Suno kay Tomagtang, magluwas sa illegal nga droga nakuha man sa arestado ang illegal nga armas luthang nga .38 revolver nga wala sang serial number.
Dugang pa sang natungdan, madugay na nga ginamonitor ang arestado antes natigayon ang madinalag-on nga operasyon.
Sa subong, detained na ini Roxas Component City Police Station kag magapangatubang sa kaso nga paglapas sang Republic act. 10591, ukon comprehensive firearms and ammunition act kag Republic act 9165 ukon comprehensive dangerous drugs act of 2002.
