VIZCAYA, President Roxas, Capiz – Arestado ang isa ka lalaki sa pagpataya sang iligal gambling, samtang dugang man sa nakuha sa iya ang armas sa Barangay Vizcaya, President Roxas, Capiz.
Ang suspek ginkilala sakay alias Carl, 27-anyos kag temporaryo nga nagapuyo sa Barangay Poblacion, President Roxas, Capiz.
Matandaan nga natigayon ang pag aresto sa suspetsado sang Agosto 22 sa takna sang 5:08 sang hapon kun sa diin nakuha sa iya ang gamit sa iligal nga pagpataya partikular ang hampang nga Bookies, nagkalain-lain nga dugang nga ebidensya kag homemade 20-gauge break-type firearm.
Sa interview sang Bombo Radyo kay Police Captain Jobert T De Los Reyes, Officer in Charge sang President Roxas, Municipal Police Station, iya ginpahayag nga ang tanan nga impormasyon kag dokumento ginatinguhaan nga makuha para sa nagakaigo nga pagpasaka sang kaso, samtang iya man ginpahayag indi tago ang amo nga lugar kun sa diin nga natigayon nga ma aresto si alias Carl.
Suno kay De Los Reyes magapangatubang sang kaso may kaangtanan sa paglapas sang Presidential Decree 1602 nga nagakahulugan bilang Prescribing stiffer penalties on illegal gambling kag Republic Act 10591 nga mas kilala sa Comprehensive Firearms and Ammunition Regulation Act.
Pahayag pa niya isa sa ginadumilian ang iligal gambling nga hugot ginabantayan kag natan-aw sang katapo sang kapulisan nga masolbar na bangud sa rason nga imbes kuntani ibakal sang nagapanguna nga kinahanglanon partikular na ang pagkaon ginawaldas ini sa pamaagi nga makaganyat sang iligal nga aktibidad.
Sa karon ginapa-abot sang President Roxas MPS ang mensahe nga likawan ang pag pasakop sa iligal nga aktibidad agud sa gihapon mapabilin ang kalinong kag katawhay sa banwa sang President Roxas, Capiz.
