TAPAZ, CAPIZ – Arestado ang isa ka lalaki sa buy-bust operation sang otoridad sa Brgy. Poblacion, Tapaz.
Ang arestado amo si alyas “Ping” Galagate nga residente man sang nasambit nga lugar.
Ang operasyon ginpangunahan sang Capiz Provincial Police Drug Enforcement Unit (Capiz PPDEU) kag sang Cluster Special Drug Enforcement Team (SDET) nga ginabug-usan sang Tapaz MPS (Lead Unit), Dumalag MPS, kag Jamindan MPS, sa koordinasyon sang Philippine Drug Enforcement Agency (PDEA) Regional Office 6.
Sa impormasyon nga nagikan sa Tapaz Municipal Police Station, nabaklan ang arestado sang isa ka heat-sealed transparent plastic sachet nga may sulod nga ginapatihan nga shabu sa kantidad nga Php 1,200.00.
Nakuha sa posisyon sang suspek ang apat (4) tanan ka sachet sang ginapatihan shabu nga may kabug-aton nga pulo (10) ka gramo kag may standard drug price nga Php 68,000.00. Lakip sa narekober ang Php 1,100.00 nga buy-bust money kag isa (1) ka black coin purse.
Gindala ang mga nakuha nga ebidensya sa Regional Forensic Unit sa Camp Martin Delgado, Fort San Pedro Drive, Iloilo City para sa laboratory examination kag ginproseso suno sa Chain of Custody Procedure.
Padayon ang imbestigasyon sang mga otoridad kag legal nga proseso batok sa nadakpan.
