PANITAN, CAPIZ– Maswerte nga nakaluwas ang isa ka lalaki, matapos nga gin-paarakan sang pagpangluthang sang duha ka mga indibidwal sa Barangay Agkilo, Panitan, Capiz.
Ang biktima amu si alyas “Ariel”, 49-anyos, casual nga empleyado sang LGU Panitan kag residente sang Barangay Concencia, sa amu nga banwa.
Samtang, ang mga suspek amu sanday alyas “Joseph”, 61-anyos, empleyado sang LGU Panitan, kag alyas “Ramos”, 37-anyos, kagawad kag residente sang Barangay Tinigban, sa nasambit nga banwa.
Sa interview sang Bombo Radyo kay Deputy Chief of Police Vince Peter Cabantug sang Panitan Municipal Police Station, ginapahayag nga samtang naga-inom sang makahulubog nga ilimnon ang mga suspetsado, naguha sa puluy-an ang biktima agud nga magbakal sa tyangge.
Dugang sini, samtang nga padulong si alyas “Ariel” sa tyangge, gin-agda ini sya sang mga suspetsado nga mag-inom, apang nagpamalibad ini.
Bangud sa nagpamalibad ini, kaangay nagpaingit ang nagkalasambit nga suspek kag gulpi nalang nga nagbunot sang armas-luthang.
Apang nakita ini sang biktima, kun sa diin nga madasig nga nagdalagan agud nga magpanago apang gin-paarakan ini sang pagpangluthang sang amu nga mga suspetsado.
Matapos ang natabo nga insidente, madasig nga nagpalagyo ang mga suspetsado.
Narekober sang mga kapulisan sa lugar ang 14 ka mga basiyo sang caliber .45 pistol nga gingamit sang mga suspek kag isa ka unit sang motorsiklo nga ginapatihan gingamit sang mga suspect.
Sa karon, nagapabilin sa kustodiya sang Panitan Municipal Police Station ang nasambit nga motorsiklo kag nagapadayon ang hot pursuit oiperation sini agud magkaladakpan ang mga suspetsado sa amu nga insidente.
