Isa ka 75-anyos nga lalaki sa China ang nangin biktima sang artificial intelligence (AI) matapos nga naghigugma ini sa isa ka AI-generated nga avatar online, nga nagresulta pa sa pagbulagay sang iya nga asawa.
Suno sa report sang Beijing Daily, ang lalaki nga ginkilala lamang sa apelyido nga Jiang, ang tuman nga na-attract sa babaye nga avatar nga nakit-an niya sa social media.
Apisar nga halata nga AI lamang ini para sa mga eksperto sa teknolohiya, napapati si Jiang nga isa ini ka matuod-tuod nga babaye.
Nangin sentro sang iya nga adlaw ang paghulat sang mga mensahe gikan sa AI avatar, nga nangin rason sang iya masami nga pagtutok sa cell phone.
Sang ginsaway siya sa sang iya nga asawa, ginpahayag ni Jiang nga gusto niya na nga makig-divorce agud mahatag ang iya bug-os nga atensiyon sa iya nga “online girlfriend”.
Sang ulihi, ang mga anak ni Jiang ang nagkumbinsi sa iya kag ginpaathag nga ang babaye ang iya nga ginapalangga ang indi matuod nga tawo kag himo lamang sang AI.
Ang kaso ni Jiang, naghatag sang atensiyon sa nagadako nga problema sa China kun sa diin ang mga katigulangan, ilabi na ang mga nagakasubo, nangin biktima sang mga AI-generated content.
Ang mga avatar nga ini ginagamit indi lamang para magbaligya sang mga produkto, kundi para man maghimo sang “emotional dependence” sa mga tumalan-aw.
Nagpaandam ang mga eksperto sa mga pamilya nga bantayan ang online activity sang ila nga mga tigulang nga himata, ilabi na kun sobra na ang ila nga paggamit sang gadgets.
Aapisar may mga benepisyo ang AI, mahimo man ini nga mangin tuman nga makatalagam, ilabi na sa mga vulnerable nga indibidwal.
