Pilas sa magkatuhay nga parte sang lawas ang naangkon sang isa ka lalaki, matapos nga ginbuno sang iya bayaw sa Sitio III, Barangay Lawaan, Roxas City.
Ginkilala ang biktima kay Cris Pacong, 24-anyos, samtang ang ginatudlo suspek ang ginkilala kay Jay Fundal, 20-anyos, lunsay mga residente sang Barangay Lawaan, Roxas City.
Suno kay PCMS. Ramil Arcangeles, Spokesperson sang Roxas City Police Station, ginpahayag nga samtang nagahinala ang suspek kag biktima, nagtiaw ang biktima nga nakighilawas ini sa iban nga babaye kabangdanan nga na-impito ang suspek kag hinali nga nagkuha sang kutsilyo kag ginbuno ang biktima.
Nag-angkon sang pilas sa wala nga tiyan kag butkon ang biktima nga gilayon naman nga ginpadangat sa Roxas Memorial Provincial Hospital (RMPH) para sa nagakaigo ngapagbulong.
Samtang, sandig sa pahayag sang biktima sa mga kapulisan, indi na sini luyag nga magpasaka pa sang kaso sa suspek nga iya sini nga bayaw kun sa diin natalana man ini nga i-release sa kustodiya sang Roxas City PNP.
Panugyan naman ni Arcangeles nga kuntani likawan nga magtiaw sang kasubong sini nga butang ilabi na kun pinamilya lamang.
