Maswerte nga nakaluwas ang isa ka lalaki nga ginpalukpan sang armas-luthang sa Sitio Cassandra, Barangay Punta Tabuc, Roxas City.
Ang maswerte nga lalaki nga wala maigo sang bala sa pagpangluthang sa iya amu si alyas “Jay-R”, nga sa karon wala pa matumod kun taga-diin ini, kag ang ginapahayag mga suspek amu ang mag-amay nga sanday alyas “Gil”, amay, kag alyas “Don-don”, anak.
Sa interview sang Bombo Radyo kay alyas “Nene”, 32-anyos, ginapahayag upod ni alyas “Jay-R”, ginsiling sini nga ginsugo siya nga magpa-load, apang sa pagbalik nya, motor nalang nga natumba ang nabilin kag wala na si alyas “Jay-R”.
Sandig naman sa mga pahayag sang pila ka mga residente, ginkakibot nila ang lupok nga ila nabatian.
Samtang, nakita naman sa CCTV footage ang pag-guha sang mga suspek nagikan sa isa ka eskinita sa crossing Cassandra kag ginpalukpan si alyas “Jay-R” kag nagbalos man ini, kay may isa pa ka lalaki ang nagapanago sa poste kag nagdugang man tiro sa amu ka target.
Madasig naman nga nakapalagyo ang mga suspetsado subong man ang target person.
Narekober naman sa lugar nga ginluntaran sang insidente ang apat ka basiyo, isa ka wala naglupok nga bala kag isa ka slug sang wala pa matumod nga sahi sang armas-luthang.
Sa karon, nagapadayon pa ang imbestigasyon sang mga kapulisan angut sa nasambit nga insidente.
