TANQUE, Roxas City – Nag-angkon sang pilas sa tuo nga siko ang isa ka lalaki matapos ginbuno sa Sitio Terrel Barangay Tanque, Roxas City.
Ginkilala ang biktima sakay alias Fin, 53-anyos, samtang ang suspek amo si alias Nel, 33-anyos, kag witness sakay alis Joy, 22-anyos nga lunsay residente sang nasambit nga lugar.
Sa nakuha nga impormasyon sang Bombo Radyo kay Police Lieutenant Colonel Rogelio L. Tomagtang Jr., Chief of Police sang Roxas Component City Police Station, ginpahayag nga sa takna sang 3:25 Agosto 14, nagreport ang biktima upod ang isa ka witness sa Roxas City Police Station matapos ang nagluntad nga pagpangbuno.
Suno sa imbestigasyon, ang biktima, upod ang witness kag iloy sang suspetsado, kun sa diin nagapungko sa sagwa sang balay sang utod sang suspetsado samtang nagakape kag nagapakig-estorya, samtang nagapadayon ang ila paghiliugyon, nag-abot ang suspetsado kag nagtindog sa likod sang grupo, nga nagapamati
sang ila estoryahanay.
Dugang pa sa impormasyon, nagsulod anay sa balay ang suspetsado apang sang nagbalik ini sa lugar kun sa diin nagahinun-anon ang biktima kag ang witness, hinali sini nga ginbuno ang biktima sing makaisa kag naigo sa iya tuo nga siko, gilayon naman nga nagpalagyo ang suspetsado pakadto sa wala nahibaluan nga lugar, sa bulig man sang Roxas City Emergency Response Team ukon “RCERT”, gindala naman ang biktima sa isa ka pampubliko nga hospital para sa nagakaigo nga pagbulong.
Sa karon, ginpreparar na sang Investigator-on-Case “IOC”, ang criminal complaint batok sa suspek.
