Lalaki nagapabilin nga missing matapos ginaalegar gin-anod samtang nagatabok sa overflow sa banwa sang Dumarao

ROXAS CITY – Nagapabilin nga missing ang 36-anyos nga lalaki matapos ginaalegar gin-anod sang mabaskog nga current sang tubig samtang nagatabok sa overflow, kahapon, Hunyo 26 sa Barangay Lawaan, Dumarao, Capiz.

Ginkilala ang biktima kay Michael Mercado Padernilla, residente sang Sitio Bajo, Barangay Bungsuan, sang nasambit nga banwa.

Sa impormasyon nga nakuha sang Bombo Radyo, ala-1 sang hapon, nakit-an ang biktima nga nagatabok sa overflow nga nagalab-ot sa tuhod ang kadalumon sang tubig sakay sa ginamaneho nga motorsiklo, kun sa diin pag-abot sa tunga-tunga, gulpi nga napatay ang motorsiklo rason nga ginbululigan ini sang duha ka persona nga itulod agud makatabok sa pihak nga dalan.

Ginapahayag, nauna na nga nakalab-ot ang biktima sa pihak apang ginbalikan sini ang duha ka persona nga nagatulod sa iya motor agud kuntani magbulig.

Apang ginapahayag nadanlog ang biktima kag gin-anod sang baskog nga current sang tubig.

Suno sa mga nakasaksi, gintinguhaan pa sang biktima nga maglangoy pahigad apang wala na ini nakabutwa bangud sa kabaskugon sang tubig.

Ginbululigan man ini sang salom sang mga pumuluyo apang napaslawan sila nga nakit-an si Padernilla tubtob sa karon.

Natukiban nga yara sa impluwensya sang makahulubog nga ilimnon si Padernilla sang natabo ang insidente.