BOMBO ROXAS – Ginbawian sang kabuhi samtang ginabulong sa ospital ang 37 anyos nga lalaki matapos ginluthang sang anay security guard sa Sitio Perara, Barangay Poblacion, Sapian, Capiz.
Ini ang ginkumpirmar ni Police Lieutenant Ma. Nanette V. Puasan, hepe sang Sapian Municipal Police Station sang mainterview sang Bombo Radyo Roxas.
Matandaan nga ginkilala ang biktima kay Eduardo Parohinog samtang ang suspek naman ang ginkilala kay Querico Gerapista, 40 anyos kag lunsay mga residente sang nasambit nga lugar.
Suno kay Puasan nga pasado alas 9 kagab-i sang nagsungka ang suspek sa mga opisyal sang barangay nga gilayon man nga ginturned-over sa mga katapo sang kapulisan matapos ginluthang ang biktima nga nag-angkon sang igo sa tiyan kag butkon.
Nagaguha sa imbestigasyon nga antes pa man nagluntad ang pagpangluthang, ginlagas sang biktima ang suspek sang nakaligad nga mga inadlaw bangud sa ginapahayag away sa ginbaligya nga bisilekta.
Ginpahayag ni Puasan nga kritikal nga ginpadangat sa isa ka ospital sa syudad sang Roxas ang biktima nga nagresulta sa pagkataliwan sini.
Nagapabilin sa karon sa kustodiya sang mga kapulisan ang suspek.
Matandaan nga gingubat kag ginhangkat sang inaway sang suspek ang biktima samtang nagainom sa balay ni Ronel Varnal kahapon nga adlaw, Enero 8.
Gintinguhaan pa nga tambagan sang mga himata sang biktima ang suspek apang sang ginalapitan ini sang pamilya sang biktima agud komprontahon, hinali sini nga gintiro ang biktima gamit ang ginaalegar 12 gauge shotgun.
