Ginapahayag nga isa ka problema sa barangay ang suspetsado sa ginpatigayon nga buybust operation sang mga kapulisan sa Fortune Street, barangay Banica, Roxas City.
Sa pagpakig-angut sang Bombo Radyo kay Punong Barangay Mike Xander Agrasada, sang barangay Banica, ginpahayag nga madugay na nila nga problema ang nasambit nga persona bangud imbolbado ini sa nagakahinabo nga kinawatay sa amo nga barangay kag sa illegal nga baluhaton.
Suno kay Agrasada nga madugay na nga nagbiya sa lugar ang amo nga suspetsado kag nagabalik na lamang ini bangud sa iban pa nga himata sa lugar agud mangbiktima.
Naglab-ot naman sa isa ka bulan ang monitoring sang mga otoridad sa amo nga lalaki kun sa diin nagresulta ini sa isa ka madinalag-on nga buybust operation.
Nagpasalamat naman si PB Agrasada sa mga otoridad sa ginpatigayon nga operation nga madagpan ang amo nga persona bangud dako ini nga bulig para sa ila kag sa mga pumuluyo nga maglinong kag maibanan na ang perwesyo sa ila nga barangay.
Sa karon, nagapabilin ini sa paghinakop sang Roxas City PNP kag natalana nga pasakaan sang mga nagakaigo nga panumbungon.
