ROXAS CITY – Nagpositibo ang isa ka lalaki nga nadakpan sa ginkasa nga drug buybust operation sang Station Drug Enforcement Team (SDET) – Roxas sa Sitio Luyo, Barangay Culasi, Roxas City , alas 4:43 sang hapon, Hunyo 22.
Gmatandaan nga ginkilala ang nadakpan kay RJ Lou Palma Roxas,28-anyos kag residente sang nasambit nga lugar.
Sa interview sang Bombo Radyo kay Plt. Col. Francisco Paguia hepe sang Roxas City PNP, ginkumpirmar sini nga nagagamit kag nagaduso sang iligal nga droga si Roxas sa ila lugar kag kaiping sini nga mga kabarangayan.
Suno kay Paguia nga sa iya pagpangusisa kay Roxas, ginsiling sini nga madamo siya sang problema kag wala sang sin-o man ang luyag nga magpamati sa iya rason nga nahimo niya ini nga buluhaton.
Madamo man ini sang kontra sa ila barangay bangud masami nga nagamaoy kag nagapangita sang away.
Makabig man suno diri nga bag-ong yanggaw si Roxas bangud wala ini sa listahan sang ila barangay nga isa ka drug surenderee.
Mahibaluan nga naglab-ot sa P88,400 nga balor sang droga ang narekober kay Roxas sa diin nakuha sa iya posesyon ang 2 ka sachet sang ginapatihan shabu nga may kabug-aton nga 13 grams, 1 ka coin purse kag mga drug paraphernalia.
Naaresto si Roxas pinaagi sa isa ka pulis nga nagpakuno-kuno nga poseur-buyer, isa ka sachet ang ginbaligya sang arestado sa baylo sang P3,500.
Sa karon, napasakaan na sang kaso nga paglapas sa RA 9165 ukon Comprehensive Dangerous Drugs Act of 2002 ang arestado samtang ginkustodiya sa Roxas Component City Police Station.
