ROXAS CITY- Nadulaan sang animo ang isa ka lalaki samtang nagamaneho sang iya motorsiklo sa Barangay Nasunugan banwa sang Dao.
Ang biktima ang ginkilala kay alyas Mario, residente sang Poblacion Ilawod, Dao, Capiz.
Sa impormasyon nga nakuha sang Bombo Radyo nagikan sa MDRRMO-Dao, ginpahayag nga samtang ginasubay ni alyas Mario ang dalanon nagikan sa Cuartero kag papauli na kun tani sa ila puluy-an sa Poblacion Ilawod, Dao hinali nalang ini nga nakabatyag sang pagsakit sa iya ulo nga gintunaan sang iya pagkalipong samtang nagadrive.
Mahibaluan nga nagatumar ini sang iya maintenance nga bulong sa sakit nga high blood apang natabuan nga wala ini naka-inom rason nga naglain sini ang iya pamatyag.
Samtang, maswerte naman nga natumba ini sa uhot kag wala ini naka-angkon sang mga pilas sa iya kalawasan.
Sa karon, yara na sa istable nga kondisyon si alyas Mario kag wala na ini nagpadala pa sa ospital.
