ROXAS CITY – Gindeklarar nga dead on arrival sang doktor sa Dao District Hospital ang 43-anyos nga lalaki matapos nga ginluthang sang wala makilala nga persona, sa Barangay San Roque, Dumalag, Capiz, alas-8:40 kagab-i sang Marso 29.
Ginkilala ang biktima kay Rudy Fuerte Fresnido, laborer kag residente sang amu man nga Barangay.
Sandig sa inisyal nga imbestigasyon sang katapo sang Dumalag Municipal Police Station, nagaguwa nga samtang nagalakat ang biktima sa dalan nagikan sa tiyangge kag papuli kuntani sa ila balay, sang natalupangdan sini nga may nagasunod sa iya nga Rusi nagaduag blue nga motorsiklo kag wala sang plate number, nga ginamaheo sang wala makilala nga persona, kag gilayon ini nga ginluthang sang makapila ka beses gamit ang wala marekober nga armas-luthang.
Nag-angkon sang kapilasan sa magkatuhay nga parte sang lawas ang nasambit nga biktima.
Ginpadangat sang mga katapo sang Dumalag Rescue Team ang biktima sa nasambit nga ospital, apang alas-9:15 sang gindeklarar ini nga patay.
Madasig nga nakapalagyo ang suspek sa wala mahibaluan nga direksyon kag padayon sa karon ang imbestigasyon sang mga kapulisan angut sa insidente.
