ROXAS CITY – Padayun nga ginabulong sa ospital ang 30-anyos nga lalaki nga nagamauy kag nagpanghaboy sang bato sa iya maagyan nga balay sa Sitio Railway, Barangay Dangula, Dumarao, Capiz.
Nag-angkon sang pilas sa dughan ang biktima nga si Ivan Altomia matapos nga ginlabo sang suspek nga si Ronnie Liboon 50-anyos sang amo nga lugar.
Nagamauy kag nagpanghaboy sang bato si Altomia sa iya maagyan nga balay.
Sa paghaboy sang bato sa balay sang suspek, nagguwa si Liboon kag hinali nga ginhan-usan sang ginauyatan nga tubo sang biktima, apang maswerte nga nakalikaw.
Sa kaakig sang suspek, ginkuha sini ang ginataklos nga sanduko kag ginlabo ang biktima nga nag-angkon sang pilas sa dughan.
Gindala sa ospital ang biktima samtang boluntaryo naman nga nagsungka sa kapulisan ang suspek nga si Liboon matapos ang hitabo.
