ROXAS CITY, CAPIZ – Dakop sang kapulisan ang lalaki nga nagpamahog nga mangsunog kuntani sang balay sa Barangay Dayao, Roxas City.
Ang suspek amo si alyas Juvel, 53-anyos kag residente sang Sitio Tulay, Barangay Baybay, Roxas City.
Sandig sa impormasyon nga nakuha sang Bombo Radyo sa kapulisan, nakabaton sang report ang Punong Barangay sang Barangay Dayao, Roxas City nga may yara sang lalaki nga nagapamahog nga mangsunog sang balay.
Gilayon man nga nagresponde ang mga Barangay Officials agud nga untaton ang pagpang-eskandalo sang suspek kag didtu nahibaluan nga yara ini sa impluwensya sang makahulubog nga ilimnon.
Ginkompronta kag gindakop sang Punong Barangay ang amo nga lalaki antes gindala sa Roxas Component City police Station.
Sa subong, nakahunong sa detention facility ang amo nga suspek kag magapangatubang sang kaso nga alarm and scandal.
