Natumod na ang lalaki nga nagpangawat sang battery sa nakapark nga motorsiklo sa guha sang barbershop sang biktima sa Barangay 8, Roxas City.
Ang amo nga suspetsado ang ginkilala kay alyas “Noy” kag residente sang Hermano Subdivision Barangay Punta Tabuc, Roxas City
Sa interview sang Bombo Radyo Kay Castor Holse Bialen, Punong Barangay sang Barangay VIII, ginapahayag nga nakapark ang motor sang biktima sa guha mismo sang iya nga barkershop sa nasambit nga lugar.
Apang pagkaaga natalupangdan nalang sini nga wala na sang battery ang iya nga motor.
Gilayon man nga narekober ang amo nga battery sa suspetsado.
Mahibaluan nga kuha sa CCTV footage ang pagkuha kag pagsipit sang amo nga suspetsado sang battery sa nasambit nga motorsiklo kag dali-dali nga naglakat.
Apang, natigayon nga natumod ini bangud naka-upod na sang isa ka tanod sa barangay ang amo nga suspetsado rason nga madali ini nga na-identify.
Wala naman balak nga magpasaka pa sang kaso ang amo nga biktima bangud suno sa iya nabalik man sini ang iya nga battery.
Gani, panugyan sang Punong Barangay nga kun may magluntad man nga kasubong nga hitabo sa ila nga barangay gilayon nga magreport sa ila talatapan agud gilayon nga maaksyunan.
