ROXAS CITY – Patay ang 38 anyos nga lalaki matapos ginlabu sa Barangay Alasaging, Maayon, Capiz.
Ginkilala ang biktima nga si Marlon Villasin, residente sang nasambit man nga lugar.
Base sa inisyal nga imbestigasyon sang Maayon Municipal Police Station, nagpadulong ang hubog nga biktima sa balay sang suspek nga si Alfredo Villanueva, 56 anyos kag ginhangkat ini sang away.
Ginsaway si Villasin sang anak sang suspek rason nga iya ini nga ginlabu nga nagresulta sa pag-angkon sang pilas sa kamot sang anak ni Villanueva.
Ginkaakig naman sang suspek ang natabo sa anak rason nga ginbalusan sini ang biktima kag iya man ginlabu.
Nag-angkon sang mga pilas sa ulo, nawong kag liug ang biktima nga nagresulta sa iya nga kamatayon.
Gilayon naman nga naaresto ang suspek nga si Villanueva matapos boluntaryo nga nagsungka sa mga kapulisan.
