ROXAS CITY – Ginkompirmar sang pamunuan sang Roxas City Police Station nga may yara sang deperensiya sa paminsaron ang lalaki nga nagwaras kag nagpangguba sang kagamitan sa St. Vincent Ferrer Parish Church sa Barangay Cagay, Roxas City.
Ini ang ginpahayag ni Police Staff Sergeant Gamin Unarse sang mainterview sang Bombo Radyo.
Ginpahayag man ni Unarse nga indi malayo sa iya ang suspek nga si Midel Alborte, 35 anyos bangud iya man ini nga paryente.
Suno diri nga may yara sang gina-inom kag gina-inject nga bulong ang suspek agud indi ini pag-atakehon sang iya sakit.
Suno pa kay Unarse nga base sa ila imbestigasyon, posible naakig ang suspek bangud wala ini ginpahanugutan nga makasulod sa simbahan sa rason nga wala ini sang suksok nga face mask kag gintuyo pa nga bun-on sang icepick ang isa nga nagabantay.
Mahibaluan nga magasugod na kuntani ang misa nga pangunahan ni Fr. Digno Jore sang gulpi lamang nagsulod ang suspek.
Ginpunggan pa ini nga makasulod apang nagpamilit ini kag nagpalapit sa altar nga may bitbit pa nga icepick kag stick.
Gilayon nga nagpanawag sang responde sa mga katapo sang Roxas City Police Station apang sang nakita sang suspek ang mga kapulisan, nagwaras pa gid ini.
Ginsipa sini ang pila ka mga kagamitan sa altar, ginlampusan ang pila ka imahen kag ginpangpusa ang pila ka mga kagamitan nga nagresulta man sa iya pagkapilas rason nga naglapta ang dugo.
