Yara na sa istable nga kondisyon ang lalaki nga aksidente nga nakabunggo ang ginamaneho nga motorsiklo sa center Island sang Aranguel Bridge, President Roxas, Capiz.
Matandaan nga ang lalaki amo si alyas “Argie”, 25-anyos kag residente sang Barangay Cubay sang nasambit nga banwa.
Sa interview sang Bombo Radyo Roxas kay PMAJ Alfred De Leon, Hepe sang President Roxas Municipal Police Station, ginapahayag nga samtang ginasubay sang nasambit nga lalaki ang dalanon nagikan sa Barangay Cubay kag padulong kuntani sa Public Plaza sang amo nga banwa gamit ang iya nga motorsiklo, hinali nalang ini nga nadulaan sang kontrol kabangdanan sang pagkabunggo sini sa amo nga center island.
Bangud sa makusog nga pagkabunggo, nag-angkon sang pilas sa magkatuhay nga parte sang lawas si alyas “Argie” nga gilayon naman ginpadapatan sang pauna nga pagbulong sang mga katapo sang President Roxas Municipal Disaster Risk Reduction and Management Council antes nga ginpadangat sa Bailan District Hospital, Pontevedra, Capiz para sa dugang nga mga pagbulong.
Sa karon, nagapabilin sa nasambit nga ospital si alyas “Argie” samtang yara na sa kustodiya sang President Roxas Municipal Police Station ang motorsiklo sini para sa nagakaigo nga disposisyon.
