Gin-aresto sang National Bureau of Investigation (NBI) agents ang isa ka lalaki nga wanted nga nagapanago na sang masobra duha ka tuig matapos ginkasohan sang sexual abuse sa pito ka tuig nga bata nga babaye sa Cebu City.
Ang akusado amo si Allen Estrada nga gindakop pinaagi sa warrant of arrest nga gin-isyu sang Mayo 25, 2023 may kaangtanan sa ginapangatubang nga kaso nga paglapas sa Article 266-A (2) naangot sa Republic Act 7610 kag gin-amyendaran sang RA 11648 ukon Sexual Assault.
Nag-ugat ang kaso sa ginpasaka nga reklamo sang lola sang biktima sa NBI-Central Visayas Regional Office (CEVRO) nga ginpalab-ot sa NBI-Dumaguete District Office (DUMDO) agud mabuligan ang pagtsekyar sang lokasyon sang suspek.
Madinalag-on nga nadakop si Estrada sang Oktubre 2 sa diin na-locate ini sa bag-o niya nga ginatiniran sa Bayawan City, Negros Oriental.
Ginrekomenda sang korte nga presohon si Estrada sa Cebu City Jail Male Dormitory sa idalom sang Bureau of Jail Management and Penology (BJMP).
