Madugay na nga nagapangbiktima sa syudad sang Roxas ang nadakpan nga nagpangawat sa sulod sang opisina sang Provincial Legal Officer sa probinsyal Capitol kahapon nga adlaw.
Matandaan nga ginkilala ang amo nga suspetsado sa kay alyas “Ponpon” 31-anyos kag residente sang Sta. Barbara, Iloilo.
Sa pagpakig-angut sang Bombo Radyo kay Police Lieutenant Colonel Lumyaen Lidawan, hepe sang Roxas City Police Station, ginpahayag nga madugay na ini nga nagapangbiktima sa syudad sang Roxas apang wala natigayon nga nadakpan bangud wala nagapursige nga magreklamo ang iya nga mga nabiktima.
Pahayag pa sang hepe nga indi lang sa syudad sang Roxas nagapangbiktima ang amo nga persona kundi sa iban pa nga mga lugar.
Kahapon nga adlaw nagpadulong ini sa talatapan sang Provincial Capitol apang naaktuhan ini nga nagpangawat sa sulod sang opisina sang Provincial Legal Officer kag narekober sa amo nga lalaki ang kapin P12,000 nga balor sang kwarta nga nakuha sini mismo sa wallet sang legal officer.
Samtang, ginatinguhaan nga makuha ang iban pa nga detalye natuhoy sa background sa amo nga persona.
Sa karon, padayon pa ang ginapatigayon nga imbestigasyon angut sa insidente.
