ROXAS CITY – Nangin emosyunal ang tiayon sang lalaki nga nasal-an hubog nga karon confine sa ospital matapos na-stroke, bangud sa nadangatan sang iya nga bana.
➠City gov’t, nagpasalig sang bulig sa pagpabulong sa tricycle driver nga na-stroke apang una nasal-an nga hubog
Ginpahayag ni Melanie Apanitan sang Barangay Gabuan, Roxas City kag asawa sang biktima nga si Rolando Apanitan nga wala kuntani maglala ang sitwasyon sang iya bana kun gilayon ini nadala sa ospital kag wala na gindala sa Roxas City PNP.
Ginapanindugan pa sini nga bisan san-o wala nagainum sang makahulubog nga ilimnon ang iya bana sa diin nagalain na ang iya pamatyag sang aksidente ini nga naka-sideswiped sa San Roque St., Barangay Inzo Arnaldo.
Nahibaluan pa kun wala nagkadto ang ila anak sa police station kag naghinyo nga dalhon sa ospital ang iya amay, wala gid naghimo sang tikang ang mga kapulisan.
Nagpautwas man sang kalain sang buot si Mrs. Apanitan bangud sa baylo patihan, ginkadlawan pa ang iya bana sang ini ang nagpalanuka kag nabatian pa nga ginhambalan nga posible nagadroga ini
Nagalibog karon ang ulo sang ginang kun ano na ang matabo sa ila bangud sa sitwasyon sang iya bana nga paralisado na ang pihak nga lawas.
Ginpalab-ot sang ginang sa Roxas City PNP nga buligan kuntani sila sa kagastuhanan sang iya bana sa ospital, bangud sa karon pa lamang nagalab-ot na sa P100 mil ang ila bill sa RMPH.
Samtang gin-athag naman ni Jasteen Bocala, responder sang Roxas City Emergency Response Team (RCERT) nga ulihi na lamang nila nakita si Apanitan nga nagatindog sa kilid sang karsada, bangud ang ila una nga ginpalapitan amo ang na-sideswiped sini.
Apang aminado nga nagpati sila nga hubog ang biktima, base sa nangin assessment sa panghulagon sini.
Wala madala sa ospital si Apanitan bangud suno diri nga okey man ang iya pamatyag kag luyag lamang nga magpahuway.
Gin-athag pa ni Bocala nga ginhinyo lamang sila sang traffic investigator nga dalhon sa Roxas City PNP si Apanitan bangud yara ini sa impluwensiya sang makahulubog nga ilimnon.
Apang aminado ini nga wala nila masimhotan kun nakainom ang biktima kag wala man nakuhaan sang vital sign, blood Pressure kag iban si Apanitan
