Ginalantaw sang mga kapulisan nga posible gin-atake sang high blood pressure ang isa ka lalaki nga nasapwan nga wala na sang kabuhi sa sulod sang iya puluy-an sa Balogo, Barangay Pagbunitan, Sigma, Capiz.
Ang biktima amo si alyas “Poldo,” 58 anyos kag residente sang nasambit nga lugar.
Sa interview sang Bombo Radyo kay Police Major Narciso V. Sables, Officer-in-Charge sang Sigma Municipal Police Station, iya ginpahayag nga natukiban nalang sang kasilingan sini ang biktima nga wala na sang kabuhi sa sulod sang iya balay.
Suno kay Sables, wala sang kaupod sa panimalay ang biktima sang natabo ang insidente.
Dugang pa sang natungdan, nga base sa inisyal nga imbestigasyon, nagapati ang pamilya sang biktima nga wala sang foul play sa kamatayon sang biktima.
