MAAYON, CAPIZ – Wala sang rekord nga nagapanguha-kuha sang gamit sa iban nga balay ang lalaki nga PWD nga nalab-an sa Brgy. Quinat-uyan, Maayon, Capiz.
Ini ang ginpahayag ni Maayon PWD President Redith Ubas sang mapakig-angutan sang Bombo Radyo.
Suno kay Ubas nga ang pagkakilala sini sa PWD nga biktima amo nga nagakadula lang ini sa ila balay kag naganilakat kag nagalibot sa banwa sang Maayon.
Dugang pa sini nga wala man sang rekord nga nagapanakit ang amo nga biktima.
Pahayag pa sini nga bilang ginikanan nasubuan siya sa natabo apang indi man sini mabasol ang suspek nga naglabo tungod gusto lang man nga pangapinan ang iya pamilya bangud sa madata nga kinawatay sa lugar kag gab-i natabo kun sa diin wala makilan-an ang PWD kag wala nagasabat kun pamangkuton.
Matandaan nga nalab-an ang wala nga kamot sang biktima nga si alyas Junjun, 20-anyos kag residente sang Barangay Poblacion Tabuc sa nasambit nga banwa. Samtang nagahabil-habil naman ang natuo nga bahin sang kamot sini matapos ginapahayag ginpilit nga ginbuksan sini ang pertahan sang kusina kag nasal-an nga makawat sang suspek nga si Richard sa Barangay Quinat-uyan, sa amo man nga banwa.
