Lalaki patay matapos ginbuno sa banwa sang Tapaz

TAPAZ, CAPIZ – Patay ang 26 anyos nga lalaki matapos ginbuno sang iya lang man kasimaryo sa Barangay San Nicolas, Tapaz, Capiz.

Ginkilala ang biktima kay Noel Mendoza alyas Maoy, residente sang nasambit man nga lugar.

Sandig sa inisyal nga imbestigasyon sang Tapaz Municipal Police Station, gikan sa binaylihan ang biktima kaupod ang suspek nga si Ramil Galagate, 21 anyos.

Apang sang nagapauli na ang duha, ginaalegar nga nagbaisay ang mga ini kag didto ginbuno sang suspek ang biktima nga nakaangkon sang pilas sa dughan.

Gindala pa sa ospital ang biktima apang gilayon man nga ginbawian sang kabuhi samtang ginabulong.

Nagapabilin naman nga at-large ang suspek matapaos nagpalagyo kasunod sang nasambit nga insidente.