ROXAS CITY – Nagapadayon sa karon ang hot pursuit operation sang mga kapulisan sa suspek nga responsable sa pagpangbuno kag pagpangluthang sa 23 anyos nga biktima sa Sitio Ilawod, Barangay San Agustin, Dumalag, Capiz.
Ginkilala ang biktima nga si Ramil Indico, residente sang nasambit man nga lugar.
Ba-se sa imbestigasyon sang pulisya, nagbaisay ang biktima kag ang suspek nga si Gualberto Faucbit sa tunga sang ila nga pag-inom rason nga ginli-ab sang biktima ang suspek.
Nauna na nga nakapauli ang suspek apang samtang nagapauli ang biktima, gintambangan ini ni Faucbit kag ginluthang gamit ang 12 gauge home made shotgun.
Samtang nagakamang ang biktima, ginpalapitan pa ini sang suspek kag ginbuno sa tiyan gamit ang wala pa natumod nga hinganiban.
Gindala pa sa ospital ang biktima apang gindeklarar nga dead-on-arrival.
Madasig naman nga nakapalagyo ang suspek matapos nakomiter ang nasambit nga krimen.
