Patay ang 24-anyos nga lalaki nga ginkilala kay Jayson matapos gintiro sang iya anay nobya sa Barangay 4, Lucena City, Quezon sang Huwebes sang aga, Marso 5 suno sa kapulisan.
Suno sa inisyal nga imbestigasyon, nagkadto si Jayson sa isa ka balaligyaan nga ginapanag-iyahan sang bayaw sang suspek agud ibalik ang mga bayo nga iya ginhulam sa 30-anyos nga suspek.
Ginpahayag nga nagluntad ang pagbaisay sa sulod sang balaligyaan antes ginluthang ang biktima.
Suno sa report, naggabot sang pusil ang suspek kag ginluthang sa likod si Jayson antes nagpalagyo padulong sa Barangay Gulang-Gulang bitbit ang armas.
Suno kay PCPT Philipp Hernandez, chief investigator sang Lucena City Police Station, posible nga “crime of passion” ang motibo sa pagpangluthang.
Nahibaluan man sa mga mensahe nga nasapwan sang mga otoridad nga broken ang suspetsado kag ini ang rason kon ngaa indi siya mapakali.
Nakita man nga daw akig ang suspetsado matapos ang pagpangluthang antes maghalin sa balaligyaan.
Ginabantayan na sang mga kapulisan ang CCTV footage agud masubaybayan ang nahamtangan sang suspek pagkatapos sang insidente.
