ROXAS CITY – Patay ang isa ka lalaki matapos ginluthang sa Barangay Agdahon, Cuartero, Capiz.
Ginkilala ang biktima kay Jason Gallardo, residente sang Barangay Centro, Dao.
Ginpahayag sang hepe sang Cuartero Municipal Police Station nga si Police Captain Mary Grace Borio, base sa ila inisyal nga imbestigasyon, nagapauli na ang biktima matapos nga gindul-ong ang iloy sang iya nga live-in partner sa Barangay Mainit, banwa sang Cuartero.
Suno pa sa nakakita nga nagasunod sa motorsiklo nga ginamaneho sang biktima, nakit-an sini nga ginparahan ang biktima sang lalaki nga sakay man sang motorsiklo nga nagasuksok sang nagaduag ‘orange’ nga t-shirt kag nakakalo.
Ginapahayag nga kasubong nag-estoryahanay pa ang biktima kag ang wala makilala nga suspek.
Didto kag ginluthang sang makapila ka beses ang biktima sang suspek nga nagresulta sa iya nga kamatayon.
Natukiban nga lima ka mga patal nga pilas sa lawas ang naangkon sang biktima.
Narekober pa sang mga otoridad ang lima ka mga basiyo sang bala sang .45 calibre nga pistol sa ginluntaran sang krimen.
Sa karon, padayon nga ginapadalman sang mga otoridad ang ila nga imbestigasyon angut sa nasambit nga insidente.
