ROXAS CITY – Patay ang 47-anyos nga lalaki matapos bun-on sang kumpare sa gintambungan nga birthday party sa Barangay Bunga, Mambusao, Capiz.
Nag-angkon sang mga pilas sa lawas ang biktima nga si Catalino Quiatchon sang Barangay Caidquid, Mambusao matapos ginbuno sang kumpare nga si Juvy Barquilla 37-anyos sang Barangay Bunga, Mambusao.
Nagaguwa sa imbestigasyon sang Mambusao Municipal Police Station nga magkaupod ang duha nga naga-inum kalakip ang iban nila nga mga abyan sa balay ni Evangelista Vieto sang may nagluntad nga komosyon.
Ginaalegar nga gintiklod sang suspek ang tag-iya sang balay nga si Vieto sa diin sang makita ini sang biktima gilayon niya nga ginpalapitan ang suspek kag ginsumbag sa guya.
Ginsundan pa sini ang suspek sa guwa sang balay tobtob nagkuha sang kutsilyo si Barquilla kag ginbuno ang biktima.
Wala pa nakuntento ang suspek kag nagsulod pa ini sa balay kasunod ang paghandus sang kutsilyo kay Vieto, apang maswerte naman nga nakalikaw ang tag-iya sang balay kag nakuha ang kutsilyo.
Gilayon naman nga naaresto ang suspek sa ginpatigayon nga hot pursuit operation sa diin nakahunong na ini karon sa Mambusao Municipal Police Station.
