Lalaki pilason matapos bumunggo ang ginasakyan nga salakyan sa poste sang CAPELCO sa banwa sang Dumalag

ROXAS CITY – Pilason ang isa ka lalaki matapos bumunggo ang ginasakyan nga Toyota Vios sa poste sang Capiz Electric Cooperative (CAPELCO) sa Sitio Ma-it, Brgy. Sto. Angel, Dumalag, Capiz.takna 9 sang gab-i.

Ginkilala ang napilasan kay Jomar Servo, 24-anyos samtang ang driver sang salakyan amu si Jayson Amago, 31-anyos residente sang Caboluan Sur, Oton Iloilo.

Sandig sa imbestigasyon sang Dumalag MPS, nagikan sa Dumalag Proper ang salakyan nga ginamaneho ni Amago sakay si Servo kag duha pa ka persona nga indi na paghingadlan kag pauli na kuntani sa probinsya sang Iloilo, apang pag-abot sa kurbadahon ginapahayag nga wala natalupangdan sang driver ang poste rason nga nabungguan ini.

Bangud sini, nag-angkon sang pilas sa magkatuhay nga bahin sang lawas si Servo kag ginpadangat sa Dao District Hospital para sa pagbulong.

Masuwerte naman nga wala napilasan ang driver kag duha pa ka sakay sang amu nga salakyan.

Samtang, bangud sa impact nagtiko ang nasambit nga poste, rason sang pagkadula sang suplay sang kuryente sa Barangay Sto. Angel kag San Miguel, sa amu nga banwa, subong man sa Brgy. Dangula, Dumarao, Capiz.

Sa karon, yara na sa kustodiya sang Dumalag MPS ang driver ka gang salakyan para sa nagakaigo nga disposisyon.