PONTEVEDRA CAPIZ – Pilas ang naangkon sang isa ka lalaki matapos ginapahayag ginluthang sang iya kaugalingon nga utod sa Barangay Yatingan, Pontevedra Capiz.
Ginkilala ang biktima kay alyas “Edward”, 29-anyos samtang ang ginatudlo suspek ang ginkilala kay alyas “Elvin” kag lunsay mga residente sang nasambit nga barangay.
Base sa inisyal nga impormasyon nagikan sa Pontevedra Municipal Police Station, ginapahayag nga nagavideoke sa ila puluy-an ang suspek apang ginsablaw ini sang biktima kag ginhinyo nga kuntani hinaan ang volume sini.
Apang, hinali lamang nga may nagluntad nga pagbinaisay sa magtimbang nga bahin kag nagresulta sa pagpangluthang sang suspek sa iya mismo nga utod.
Bangud sa natabo, nag-angkon sang pilas sa wala nga bahin sang iya dughan.
Gilayon man ini nga ginrespondihan agud hatagan sang pauna nga pagbulong antes ginpadangat sa ospital.
Narekober sa lugar ang baseyo sang isa ka slug sang caliber .45 mm nga armas luthang sa lugar apang wala na makit-an ang gingamit sini sa pagpangluthang.
Sa karon, nagapabilin sa paghinakop sang Pontevedra MPS ang suspek para sa nagakaigo nga disposisyon.
