Lalaki pilason matapos ginbuno sa banwa sang Cuartero

ROXAS CITY – Padayon sa karon nga ginabulong sa Roxas Memorial Provincial Hospital ang isa ka lalaki matapos ginbuno sa Barangay Sinabsaban, Cuartero, Capiz.

Ginkilala ang biktima kay John Bigcas, residente sang nasambit man nga lugar.

Base sa inisyal nga impormasyon, kaupod sang biktima ang iya abyan nga si Arc Dela Torre nga nagpadulong sa isa ka tiyangge agud magbakal sang ice.

Nagpabilin ang biktima sa tricycle nga ila ginsakyan samtang may ginbakal ang iya abyan apang diri kag nagpalapit sa iya ang suspek nga si Edilino Dullano sang Barangay Tapulang, Maayon kag ini ang ginbuno.

Bangud sa pilas nga naangkon, gindala sa ospital ang biktima agud madapatan sang nagakaigo nga pagbulong.

Gilayon naman nga naaresto sang mga otoridad ang suspek.