ROXAS CITY – Pilason ang isa ka mister matapos ginlabo sang iya bayaw sa Barangay Sibaguan, Roxas City.
Ginkilala ang biktima nga si Michael Villanueva, 41-anyos, samtang ang suspek ang ginkilala kay Rogelio Arroyo, 59-anyos, nga lunsay residente sang nasambit nga lugar.
Sa nakuha nga impormasyon sang Bombo Radyo kay Rochelle Arroyo, 44-anyos, live-in partner ni Villanueva ginapahayag nga ginpamangdan sila nga nagkuha sang cellphone sang suspek sa kwarto sini, rason nga may nagluntad nga komprontahanay sa tunga sang mag-utod sa guha sang balay sang ila iloy.
Bangud sa mainit nga tension, nagpauli ang suspek sa iya balay kag nagkuha sang binangon.
Dugang pa ni Rochelle nga gilayun nagpadulong sa sulod sang ila balay ang suspek, nga ginaalegar yara sa impluwensya sang makahululubog nga ilimnon kag ginlabo ang biktima.
Maswerte naman nga nakatambag ang bata ni Rochelle, rason nga madasig nakaguwa sa ila balay ang biktima.
Nag-angkon sang pilas sa iya abaga ang biktima nga madasig ginrespondihan sang katapo sang Roxas City Emergency Response Team (RCERT) agud dapatan sang pauna nga pagbulong.
Sa karon, yara na sa istabli ang kondisyon ang biktima samtang, padayon pa nga ginaayam sang mga kapulisan ang suspek matapos nga makapalagyo matapos makumiter ang krimen.
